No rallye Cantabria Infinita conseguiu a segunda vitoria, na segunda cita do equipo Café Candelas co Campionato de España de Rallyes de Asfalto. Pedro e Marcos Burgo dominaron de principio a fin a categoría de Gr. N, dando moi poucas opcións ós seus rivais.
Pese a chegar como líderes da clasificación dos vehículos de grupo N, a situación non asemellaba fácil dado a calidade e cantidade da lista de inscritos. Pero os lucenses non se quixeron ver sorprendidos e dende os primeiros compases a proba impuxeron un ritmo que, pese a non asumir riscos innecesarios, amosouse demasiado rápido para os seus rivais, que non conseguiron seguilo.
O Mitsubishi Lancer Evo IX, unha vez máis foi o máis rápido, e ademais de lograr vencer no grupo N, tamén logrou a vitoria na Mitsubishi Evo Cup, e finalizou na sexta posición absoluta a proba. Con este excelente resultado, consolidan a súa posición ó fronte do campionato e da Evo Cup, antes de chegar ós rallyes galegos, que teoricamente lle favorecen.
Pedro amosouse moi cómodo durante toda a xornada co comportamento do coche, e incluso durante os tramos da tarde puido engaiolar á afección coas súas longas derrapadas. No último tramo, con neumáticos de seco, e cunha gran cantidade de chuvia, logrou superar á maioría dos S1600 pese a realizar un trompo, polo que non puido loitar pola quinta praza.
En dúas semanas a próxima cita será o Rallye Rías Baixas (Vigo), no que se os ditos non fallan, e "non hai dous sen tres" poderiamos ver unha nova vitoria do equipo Café Candelas. Sen dúbida será o seu principal obxectivo, para dirixir da mellor forma o resto da tempada.