Tralo acontecido no primeiro rallye do Campionato Galego, o equipo Café Candelas presentábase no Rali Ría de Noia, con máis gañas que nunca, de demostra-lo que podería acontecer en Lalín.
Pese ás choivas do venres, o sábado amencía con máis claros que nubes, aínda que o primeiro tramo estaba bastante mollado e sucio. O Mitsubishi, cos Hankook Z210 amosábase intratable, e lograba nos menos de trece quilómetros de San Finx, unha vantaxe importante sobre os seus máis directos rivais.
O segundo dos tramos, practicamente seco, serviría a Pedro para estrea-los Hankook Z209, que se amosaban igual de efectivos, logrando un novo scratch. A repetición dos dous tramos, serviría para conseguir dúas novas vitorias parciais, e aumenta-la vantaxe sobre o segundo clasificado a case un minuto, ó final da primeira parte.
Pedro e Marcos amosábanse optimistas, aínda que as características dos tramos da tarde, favorecían ós vehículos Kit Car. Sen tomar riscos innecesarios, marcaban un bo ritmo, que lles permitían seguir rabuñando segundos ós pilotos que lles seguían, para chegar ó Parque Pechado como vencedores indiscutibles, cunha diferenza superior ó minuto con respecto ó segundo clasificado. Unha vitoria e unha diferenza que se pode interpretar de moitas maneiras, pero que sen dúbida, deixa moi bo sabor de boca a tódolos membros do equipo.
Trala cerimonia do cava e a foto con tódolos membros do equipo, Pedro, moi contento, comentaba: "Aínda que a vitoria era o noso obxectivo principal, tamén queriamos proba-la nova suspensión e os novos neumáticos. Todo foi perfecto, os neumáticos amosaron unhas calidades cobizables e o equipo funcionou á perfección como sempre. Salvo o Rali do Cocido, estamos empezando moi ben o ano, o que nos serve para agradecer a Café Candelas e a Hankook o gran esforzo que están facendo este ano co noso equipo. Agora a pensar na nosa próxima cita, o Rallye de Terra de Ourense, algo novo para min"
O Campionato de España de Rallyes de Terra será a próxima cita para o equipo Café Candelas, o sábado seis de Maio. Ese mesmo fin de semana, na xornada do domingo, Pedro tentará estar tamén na Suba a Taboada, como agradecemento ós membros da Escudería Taboada pola súa gran colaboración co equipo nas últimas tempadas.